ازاي تقدر اتعابك
في البداية نحب ان ننوه ان الموضوع لحديثي التخرج لان للاسف مفيش مكتب بيعلم المحامي ازاي يقدر اتعابه ولا حتى بيعلم حاجة اصلا مفيش غير مص دم الشباب مش اكتر
ثانيا احنا بس هنوضح بعض النقاط ممكن ان يغفلها المحامي بمعنى هنقدم طريقة بسيط يقدر يفكر يعتبرها نقطة بداية يتعلم منه ازاي يقدر اتعابه واكيد الواقع العملي هيتعلم منه افضل من كلامنا بكتير
كمحامي ازاي تقدر اتعابك
احنا هناخد دعوى زي صحة التوقيع كمثال معانا عشان اكتر دعوى منتشرة وغالبا بتكون اول دعوى بيشتغلها اي محامي مبتدئ
اولا : اهم حاجة اوعى تصرف من جيبك على اي شغل مهما كان خصوصا ان مصاريف المحاكم كتير
طيب نرجع لدعوتنا وزي ما قولنا اول حاجة تفكر فيها المصاريف طيب احسبها ازاي ؟!!
اول حاجة تحسبها الرسوم والضرائب لو مش عارف اسال قبل ما تحدد اتعابك لو متوقع هتكون كبيرة جدا يبقى افصلها عن الاتعاب زي رسوم الشركات ورسوم تسجيل الشهر العقاري ، طبعا صحة التوقيع رسومها معروفة للجميع
ثانيا هتروح المحكمة كام مرة ودي هتعرفها بالخبرة في كل مرة تشتغل فيها يعني مثلا صحة التوقيع
مشوار ترفع فيه الدعوى واما يتم ايداعها محضرين في نفس المحكمة او المحضرين في محكمة اخرى
واذا كان المحضرين في محكمة اخرى مشوار لاستلام الاعلان
ويوم لحضور الجلسة
ويوم للتأشير على اعادة الاعلان وتلسيمها محضرين
ويوم اخر لاستلام الاعلان
حضور الجلسة وتقديم اعادة الاعلان
لحد هنا اجراءات متشابهة مع كل الدعاوى طبعا هناك دعاوى تتطلب اجراءات قبلها سواء تحرير محضر او استخراج مستندات او فض منازاعات لابد ان تضعها في الحسبان
ثم بعد ذلك استلام الحكم والاعلان به
اخيرا شهادة بعدم حدوث استئناف ثم استلام المستندات
يعني تقريبا هتروح المحكمة في حدود 10 مرات
هتحسب مواصلاتك ( المواصلات حاليا بتمثل مشكلة اقل مشوار لاي محكمة رايح جاي ممكن يكلفك على الاقل 10 يعني غالبا
هتصرف 150 او 200 مواصلات مثلا + مصاريف التصوير والطباعة لانها حاليا اصبحت تشكل رقم مش صغير بالنسبة لدعوى زي صحة التوقيع
+ اهم حاجة فلوس الموظفين لازم عمل حسابك على الاقل 150 جنيه مثلا موظفين في اي دعوى تشتغلها
طبعا اختيارك الاول انك مش هتدفع ولا مليم بس للاسف احيانا الظروف بتجبرك عشان كده يفضل تعمل حسابك من الاول افضل ما تلاقي نفسك بتدفع من جيبك
اخيرا اتعابك
كل مسبق عبارة عن مصاريف اساسية في اي دعوى هتشتغلها لكن اتعابك
شوف تعب المواصلات والطريق وطابور التصوير والخزنة والجدول كل ده، ولسه يوم الجلسة ده لوحده تعب وارهاق كفاية انك ممكن تقف بالساعات تستنى الرول سليب بيتك ونازل عشان تتعرض لكل ده
كل شغل فيه التعب ده واكتر بس مفيش حد بيتنازل عن حقه او بيقلل من تعبه سواء كان حرفي او موظف او غيره كلهم بيتعبوا واول حاجة بيسالوا عليها مقابل التعب
ثانيا مفيش حاجة اسمها انا هاخد مصاريف القضية وبس ده كلام ما ينفعش حرام عليك مجهودك ووقتك ربنا هيحاسبك عليهم
قدر مجهودك كويس ما تقولش الناس بتاخد كذا لا انت قدر بطريقتك ، وافتكر ان اي شغل هتشتغله مهما كان بسيط هياخد وقت كان ممكن تخلص فيه شغل تاني ، وممكن بسببه تتأخر في انجاز حاجة تضطر نتيجة التأخير ده انك تدفع فلوس
اكيد كلامي ممكن يكون مش طبيعي للبعض والبعض الاخر ممكن يشوفه كلام غلط من اول حرف لاخره ده شيء طبيعي لان كل محامي ليه طريقته الخاصة في تقدير مجهوده تختلف عن الاخر